Poto : Pdt. Sikpan K.P. Sihombing, MTh. MPd

PDT. SIKPAN K.P. SIHOMBING, MTH, MPD

PSALMEN 112: 1-10

Dongan sahaporseaon, mansai na denggan situtu molo sai diparsinta jolma martua (berbahagia) ibana, sada sian tujuan ni ngolu ni jolma do i. Ndang adong jolma na marsintasintahon asa lusut, mago, susa, gok arsak, gok sidangolon ibana, kebalikan ni ngolu na martua (berbahagia) doi.

Ala rikkotna dapot ngolu na martua (berbahagia), ingkon antusan do songon dia na martua, boha bahenon mandapot i, jala aha mambahen iba martua, jala sian dia do boi dapot hamartuaon (keberbahagiaan) i. Porlu i, asa unang masa songon nidok ni hata Batak: “nirimpu parhunikan, hape do pargadongan; nirimpu parsaulian; hape do hamagoan.”

Parjolo ma ingkon antusan aha lapatan ni martua (Indonesia: berbahagia; Heber: ’asre’asar; Gorik: makarios; Inggris: be blessed; happy; Simalungun: martuah; Karo: malem: … angka hata on dipangke di angka terjemahan LAI). Taantusi ma jo lapatan ni deba sian hata on, tarlumobi di hata aslina di hata Heber.

Hata Heber ’ašar ’ešer (kb) ’ašre (kontr. pl)] lapatanna: (1) to go straight on (mardalan di dalan hapantason: Poda 9:6); to guide, direct aright (manogunogu; mangarahon di dalan natigor). (2) to pronounce happy (tardok marlas ni roha); to call blessed (tardok tarpasupasu). ’ešer (kb) = happiness (hamartuaon); blessedness (hatarpasupasuon).

Di Kamus Besar Bahasa Indonesia songon on do lapatan ni bahagia (martua): (1) keadaan atau perasaan senang dan tenteram (bebas dari segala yang menyusahkan: keadaan manang sonang dohot dame ni panghilalaan). 2) beruntung (maruntung); berbahagia (marhasonangan/martua): Contohna: saya betul-betul merasa bahagia karena dapat berada kembali di tengah-tengah keluarga (tung mansai sonang panghilalaanhu ala boi muse rap dohot keluarga).

“Berbahagia” (martua) i ma dalam keadaan bahagia ( keadaan sonang); bahagia (sonang/martua); menikmati kebahagiaan (mandai hasonangon). Kebahagiaan (hatuaon) i ma kesenangan dan ketenteraman hidup (lahir batin); keberuntungan; kemujuran yg bersifat lahir batin (hasonangon dohot hadameon ni ngolu partondion dohot siganupari /di pardagingon); hatuaon na marrumang partondion dohot pardagingon). Blessed (tarpasupasu). Happy (marlas ni roha). Makarios (na martua). Sada sieahan do keadaan martua manang asa boi mandai/manghilala hamartuaon. Hamartuaon, i ma keadaan na dietong sada jolma nunga tung mansai las jala sonang situtu rohana, ala sahat ibana tusi, jumpangna, jala didai/dihilala ibana keadaan i. Ala keadaan/kondisi (situasi) do hamartuaon (mandai/mandapot hatuaon), ingkon siparjuanghonon do i. Misalna: Diparade Tuhan Jesus Kristus ma hatuaon tu angka jolma gratis (sola gratia). Ingkon parjuanghonon ni jolma i do asa jumpang jala dapotna hatuaon na gratis i, jala asa dapotna hamartuaon (keadaan berbahagia, keberbahagiaan). Di parjuangan i, ingkon jumolo do tangkas rumushonon keadaan songon dia ma na masa tu iba, asa tardok ni iba dohot tardok ni halak jala tardok ni Tuhan i, iba nunga martua. Misalna: Nunga martua au, molo dilehon Tuhan i di au anak dua, sada boru jala sude nasida mandapot karejo na denggan, marrumatangga denggan, jala adong sian ganup nasida pahompuku, jala sahat au muse tu surgo i. Molo songon i rumusan ni keadaan hamartuaon/cita-cita, bahenonna ma angka ulaon lao boha bahenon mandapot i. Ingkon pastihonon do ise dongan lao mangeahi hamartuaon i; jala sian dia do pasti dapot hamartuaon i. Tontu ingkon adong do dua silibathonon ni silului hamartuaon i dibagasan usahana mandapot hamartuaon i, i ma: (1) Tuhan Jesus Kristus; (2) dohot portibi/jolma na humaliangna.
Di Psalmen 112 on dipaboa do ise silibathonon ni halak Kristen, asa dapotna hamartuaon; dohot songon dia ma rumang ni hamartuaon sialamanna (sihilalaonna/sidaionna) jala angka dia ma usahana asa tangkas dapotna hamartuaon i. Silibathonon tangkas asa dapot hamartuaon i i ma:
a). Debata Jahowa.
Goar on marlapatan: “Ibana adong, Tongtong adong, manang didia pe boi do Ibana adong; dohot “Ibana mambahen adong”, Panompa, Sibahen manjadi nasa na adong. GoarNa i pe nunga manudu tu hadirion ni Jahowa na boi mambahen jolma dapotan hamartuaon, jala mangalehon tu jolma mansai godang ragam ni hatuaon. Jahowa do mambahen boi adong hatuaon dohot hamartuaon pinarsinta ni jolma. Ditanda ibana do ia Jahowa i do Tuhan pardengganbasa, parasi roha jala nabonar. Pasti ndang kecewa jolma mar-Tuhan tu Debata Jahowa di bagasan Jesus Kristus.

Adong tolu sibahenon ni jolma asa Jahowa gabe dongan ni jolma tingki marjuang mandapot hamartuaon dohot angka hatuaon: 1). Manghabiari Jahowa. 2). Marlomoniroha situtu di angka patik ni Jahowa. 3). Marhaposan tu Jahowa. Manghabiari Jahowa i ma patunduk diri tu Jahowa dohot tu huasoNa; mamatuhi/unduk dohot mangulahon lomo ni roha ni Jahowa (jala sai tangi tu parenta ni Jahowa nilehonNa nuaeng on asa ulahononna), huhut torus pasangaphon Jahowa di tingki naune dohot na so une. Marlomoniroha di angka patik ni Jahowa, lapatanna: torus manjahai, mangantusi, manghangoluhon patik (tona) ni Jahowa naung nilehonNa jala naung didokumenhon di Buku Nabadia i (Padan na Robi dohot Padan na Imbaru). Manghaposi Jahowa, lapatanna: marpanghirimon na mangolu jala yakin botul, na pasauton ni Jahowa do angka baga-baga asi ni roha dohot pasupasuNa, asa sampe boi daion hamartuaon jala dapot angka hatuaon na gratis i marhite angka parjuangan na mambahen sahat sudena i tu diriniba nasihol martua/marhatuaon dohot dapotan tua. Silibathonon ni na giot martua asa dapotna angka hatuaon jala marhatuaon ibana, i ma:

b). Angka donganna jolma.
Anggka dongan jolma, tarlumobi na adong di humaliang ni ngoluna. Di bagasan ni i dibahen ibana:

  • Manaburi ibana jala mangalehoni tu napogos;
  • Ndang olo ibana mambaloshon na jahat na niaena sian donganna jolma tu na manjahati ibana, alai dipaima do asa Jahowa namambaloshon hajahaton i tu parjahat i.
  • Bagian ni paruhuman ni jolma na adong di luatna i do ibana, jala diusahahon ibana asa siat (tarondolhonsa) hatana di paruhuman i.
  • Torus do ibana mangusahahon asa marbarita na denggan dirina di tonga-tonga ni hajolmaon na humaliang ibana.
  • Tongtong do dipartahanhon ibana hatigoran naung disuanhon Jahowa tu ibana di tonga ni hajolmaon;
  • jala tung denggan dipatuduhon ibana hatimbulon ni tandukna tu aNGka jolma nahumaliangna, na gabe pasupasu tandukna na timbul i tu donganna jolma.

Angka parjahat ndang porlu dohot libathonon ni nagiot dapotan hatuaon manang nagiot marhatuaon di bagasan parjuanganna laho mandapot/mandai/manghilala hatuaon dohot hamartuaon i. Ai marpiarpiar do muruk ni Jahowa tu angka parjahat. Patungoripon do ipon ni angka parjahat bahenon ni Jahowa, jala malangke do parjahat i, huhut matua lonong do angka parjahat i bahenon ni Jahowa. Jadi molo naeng martua manang marhatuaon manang dapotan angka hatuaon sasahalak, unang dais-dais jala unang dipadohotdohot ibana angka parjahat di bagasan ngoluna dohot di bagasan parjuanganna.
Dongan sahaporseaon, adong manang piga keadaan nanialaman manang na masa di ngolu ni jolma na martua, dipaboa parpsalmen on tu hita. I ma:

  • Sangap ma pinomparna i sogot di tano on. (Anak cucunya akan perkasa di bumi).
  • Dapotan pasupasu ma sundutna sogot. (Keturunannya akan diberkati).
  • Hamoraon marlobilobi di bagasan jabuna.
  • Hot do hatigoranna i ro di salelenglelengna.
  • Binsar do di ibana hatiuron di haholomon.
  • Mardohar (mujur) ibana.
  • Tarondolhonna hatana di paruhuman (siat hatana jala hatana i na gabe solusi tu angka parsoalan
  • Ndang tagamon humordit ibana salelenglelengna (ndang tedeng alingaling ibana di prinsip dohot haporseaon).
  • Marbarita (nauli) salelenglelengna ibana.
  • Ndang tagamon mabiar ibana binahen ni barita hinamago.
  • Nalom rohana.
  • Marsitiopan rohana (ndang sai guga rohana).
  • Boi ibana manaburi.
  • Jala tolap ibana mangalehoni tu napogos.
  • Timbul tandukna (gabe pamimpin ni bangso/houmna ibana).
  • Tolapna mangalo angka hajahaton dohot parjahat.

Na sampulu onom on ma hatuaon ni angka na manghabiari Jahowa, na mangaradoti angka patikNa, jala na marhaposan tu Jahowa, manang angka partigor manang na mambahen pikkiran ni Jesus Kristus gabe pingkiranna. Sai dohot ma huria ni halak Kristen sinuaeng mandai/mandapot angka hatuaon dohot hamartuaon na songon i. Dapot ni ganup Kristen sinuaeng on do angka hatuaon dohot hamartuaon na songon i (manang lobi sian i), molo tangkas nasida ganup manghabiari Jahowa, mangaradoti patik ni Jahowa (patik haholongon i), jala tangkas marhaposan tu Jahowa di bagasan ngoluna be. Amen.

LEAVE A REPLY

Please enter your comment!
Please enter your name here