Poto : Pdt. Sikpan K.P. Sihombing, MTh. MPd

Ev : Psalmen 27:1-6.

Mardomu tu turpuk Minggu sadarion, ringkot taringamangi hata ni syair ni BE No. 213 ; 214: “Dung sonang rohangku di baen Jesus i, porsuk pe hutaon dison. Na pos do rohangku di Tuhanta i, dipasonang tongtong rohangkon. Sonang do, sonang do, dipasonang tongtong rohangkon. ; Sonang dilambung Jesus, sonang na ro tusi. Unang be ho mabiar lao mandapothon i. Tongtong dijouhon Jesus: Sai ro ma ho tu Au, tadingkon haholomon jala haposi Au.”

Lam boha ma sonang (aman) ni rohanta molo tangkas taboto na tutu di bagasan pangondion (perlindungan) ni Tuhan i ngolunta on? Angka ise ma na mabiar (takut) dohot ise ma na biahaton (gemetar) muse? Tung so adong do sihabiaranta/biahaton hita molo so parjahat-manjahati jala so parmusu-mamusui hita tu manang ise pe, jala ndang tagamon martinggangan (tergelincir), jala marragean (jatuh) hita molo so olo hita manjahati dohot marmusu.

Sihabiaranta dohot na mambahen biahaton hita, molo manjahati-parjahat, parmusu-mamusui hita, alai anggo so manjahati-parjahat, parmusu hita, tung ise ma sihabiaranta dohot mida ise ma hita biahataon?

Tontu ngolu ni angka na manjahati-parjahat, parmusu do na patut mabiar, biahaton ala ujungna i do na martinggangan dohot marragean. Alai boha do asa mandirgak (tegak) ulunta mida angka musu humaliang hita dohot asa sai pos rohanta (tetap percaya) disi nang pe marhoronhoron (berkemah) parangan (tentara) angka na manungkum (mengepung) dohot hehe parmusuon (timbul peperangan) dompak hita? I do na patut-ringkot sipingkiranta. Nda laos i do didok hata ni Ende No. 247:1-4:

  1. “Sai hehe ma hamuna, hamu parangan ni, Tuhanta Jesus Kristus tu paraloan i. Ai ndang tarbaen so monang, nda na mangalo ho; ai musu ni Tuhanta tung ingkon talu do.”
  2. “Tangihon panjouonNa tu hamusuon i, ihuthon ma hataNa mangalo dosa i. Ibana do donganmu mandopang musu i, i pe tongtong haposi Tuhanta Jesus i.”
  3. “Ndang jadi haposanmu gogom sandiri da…” 4. Manaon ma ho satongkin di paraloan i…”

Adong tolu hal na mambahen ngolunta manang tu ise pe ndang ringkot adong sihabiaranta dohot mida ise pe ndang ringkot biahaton hita, ala ndang kalas parjahat dohot manjahati hita, alai halak do parjahat-manjahati hita. Ndang kalas parmusu dohot mamusui hita, alai halak do parmusu-mamusu i hita.

Molo tangkas marsitutu hita jala manggogo dohot di bagasan haporseaon hita mambahen Jahowa tolu hal di ngolunta, i ma: “Panondanginta, hatuaonta, partanobatoanta” (terangku, keselamatanku, benteng hidupku). Marhite na tolu hal on adong di bagasan pos ni roha dohot haporseaonta, tung ise be sihabiaranta dohot mida ise be hita biahaton? “Molo Debata donganmu, ise be alom, musum? Alai molo so Debata donganmu, holan manjahati-parjahat, parmusu-mamusui na ma ngolum jala godang diula ho hajahaton dohot parmusuon, godang alom dohot musum (bnd Rom 8:31). Justru angka parjahat mangarongrong (menyerang) hita naeng manganhon sibukta, sisosak (lawan) hita dohot musunta, ingkon i do martinggangan (tergelincir), marragean (jatuh). I do halobian, semangat, las ni roha, pos ni roha, gogo ni angka na porsea na mambahen Jahowa panondangina, hatuaonna, partanobatoan ni ngoluna. Ingkon murak (malu) ma nian jala maila (tersipu-sipu) angka na tumahi (ingin) hosangki, ingkon sumurut tu pudi jala murak angka na mangkalomohon hinamagongku (Psalmen 70:2 Alk ay 3).

Molo tangkas Jahowa tabahen panondanginta (terangku), tontu siboan panondang ma hita marhite na parrohon las ni roha, pasupasu dohot hangoluan jala taparbuehon 3 H manang 3 K parbue ni na tiur i, i ma: “Habasaon, hatigoran, hasintongan” (kebaikan, keadilan, kebenaran. Ida Epesus 5:9). Jahowa panondanginta, laos i do Jahowa hatuaonta, ai ganup Minggu do tajalo pasupasu andorang so mulak sian parmingguonta: “Dipasupasu… Disondangkon Tuhan Debata ma bohiNa tu hita jala…” (4 Musa 6:24-26). Nda panondangi ni Debata na manondangi ngolunta na gabe hatuaonta dohot hangoluan nang las ni roha di ngolunta? Ai so adong tahi parjahat-hajahaton-manjahati, parmusuon-mamusui di angka na mambahen Jahowa panondangina dohot hatuaonna, gariada mangalehon las ni roha, pasupasu dohot ngolu jala diparbuehon parbue ni na tiur i. Mangolu di bagasan panondangi ni Jahowa, tontu mangolu di bagasan sondang ni Tuhan i ngoluna di si ganup tingki, ala nunga tangkas dilambungna hatiuron ni Debata gabe di ida hatiuron i (Psalmen 36:10) jala jumpangsa hatuaon na sian Debata, ala laos Jahowa tongtong dibahen hatuaon ni ngoluna. Anggo angka parjahat, manjahati, angka parmusu, mamusui angka halak na mambahen Jahowa panondangina, hatuaonna dohot partanobatoanna sai hira babiat laho manganhon sibukna. Alai nang pe marhoronhoron parangan manungkum ngoluna jala hehe parmusuon dompak ngoluna, sai pos do rohana disi. Aha muse mambahen boi songon i ngolu ni angka na mambahen Jahowa panondangina, hatuaonna, partanobatoanna?

I do halobian, hasurungan ni angka na mambahen Jahowa panondangina, hatuaonna, partanobatoanna, ndang parjahat, manjahati, ndang parmusu, mamusui, alai tung sada do dipangidohon jala sai i do dilului rohana: NAENG MIAN IBANA DIBAGASAN JORO NI JAHOWA SALELENG MANGOLU IBANA.

Dipartingkian on, boha do dipangkilalahon ruas ni huria dung bongot, mian di bagas joro ni Jahowa? Tagamon do ulaning dipangkilalahon dame, sonang ngoluna manang so dame, so sonang ngoluna?

Laos i do na sai dipangidohon jala sai dilului ruas ni huria naeng mian dibagasan joro ni Jahowa manang cukup ma holan mendaftar gabe ruas ni huria, alai ndang hea sai dipangidohon, dilului: “Naeng mian dibagasan joro ni Jahowa saleleng mangolu-saleleng gabe ruas ni huria?” Nda dengganbasa (kebajikan) dohot asi ni roha (kemurahan) ni Debata mangihutihut hita saleleng mangolu hita molo masuhanta bagas ni Jahowa salelenglelengna? (23:6).

Ndang tagamon be parjahat, musu mangihutihut saleleng hita mangolu di angka na mambahen Jahowa panondangina, hatuaonna, partanobatoanna, ala sai dipangido, dilului rohana naeng mian dibagasan joro ni Jahowa saleleng mangolu. “Debata do partanobatoanku, marhaposan (berlindung) tu Ibana do ahu, lombulombungku (perisaiku) dohot tanduk ni partuaonku (tanduk keselamatanku), parondingondinganku (kota bentengku) dohot haporusanku (tempat pelarianku), sipartumpak (juruselamatku) di ahu, Ibana palua ahu sian uhum gogo. Sai hupajoujou do Jahowa na tama sipujion i, jadi malua ma ahu sian angka musungku.

Sai hulotongi (mengejar) do angka musungku, laos husiaphon (kupunahkan) nasida, jala ndang mulak ahu, paima sun nasida hurendephon (kuhabiskan). Jala nunga dipaundar (lari) Ho angka musungku, gabe siap hubahen angka na mangkosom ahu” (2 Samuel 22:3,4,38,41).

Angka na mian di bagasan joro ni Jahowa, i do na paidaida hinadenggan (menyaksikan kemurahan) ni Jahowa dohot mamingkiri (menikmati) ganup sogot di bagasan joroNa i. Sonang do roha ni angka na mian di bagasan joro ni Jahowa ala diondingi (dilindungi) ibana di bagasan undungundungNa di ari hinamago (bahaya), ditabunihon, dipanangkok tu dolok partanobatoan, lapatanna: Debata pasintong, patigor uhum di ngoluna gabe sonang-nalom (aman) rohana siala pangondingion ni Tuhan i. Ala nunga tangkas Jahowa dibahen panondangina, hatuaonna, partanobatoanna, gabe diondingi ngoluna. Saluhutna i, asa mandirgak (tegak) uluna mida musuna na mangkaliangi (sekeliling) ibana. Marhitei, sonang ma rohana laho pasahathon pelean pujipujian, ndada holani, marende ibana mamalu parhinaloan mamuji Jahowa. Aha do ende ni angka na mambahen Jahowa panondangina, hatuaonna, partanobatoanna dohot angka na mian di bagasan joro ni Jahowa nang angka naung diondingi Debata? “Dohot do dilangku mangendehon hatigoranMi manipat ari, asa maila jala murak angka na mangalului hinamagongku” (Psalmen 71:24).

Buku Ende No. 23:1-3:

  1. “Jesus hami ro dison, asa masihangoluan…
  2. Holom rohanami be, nang parbinotoannami, molo so ro TondiMi manondangi rohanami. Ingkon Ho do paturehon dalannami sidegeon.
  3. Sondang sian Debata, hatiuron sian ginjang. Baen ture sondangima, rohanami asa sonang. Lao manjalo hangoluan, pinatupaMi, o Tuhan.”

BE No. 172:1 “O Jesus Panondang di portibi on. Mula ni na torang, tangi hatangkon. Sai asi rohaMu dipardosa on. Ho ma mangapuli au na marsak on.

BE No. 91:2 “Hatuaon do las ni roha do hangongot ni Tuhanta i. :,: Monang do Jesus talu si bolis; las be, las be ma rohanta i. :,:

BE No. 117:1,3.

  1. “Jahowa, Debatanta do partanobatoanta. Musunta ingkon talu do di baen pangondinganta. Ianggo musu i, i ma si bolis i; jorbut do tahi ni, mangago jolma i; ndang dapot na mangatup.”
  2. “Gok begu pe portibi on
    na naeng mamolgak hita. Nda tung mabiar hita on, ai ingkon monang hita. Ai nang tarrimas pe sibolis i tahe, ndang habiaran be ai nang sahat pe tuk do manaluhonsa.”

Ngolu na mambahen Jahowa panondangina, hatuaonna, partanobatoanna, i do ngolu na surprise, ala ndang parjahat-manjahati, ndang parmusu-mamusui gabe sonang rohana siala pangondingion ni Debata di ngoluna, ndang adong ise pe sihabiaranna jala mida ise pe ndang biahaton. Alai halak na so mambahen Jahowa panondangina, hatuaonna, partanobatoanna, i do ngolu na separatisme, gabe parjahat-manjahati, parmusu-mamusui jala ndang hea sonang rohana, ujung na martinggangan, marragean. Amen

LEAVE A REPLY

Please enter your comment!
Please enter your name here